Anthropic o’zining AI agenti Claude Cowork‘ni mobil ilova va veb platformalarda ham foydalanishga taqdim etishni boshladi. Shu paytgacha ushbu funksiya faqat desktop ilovasi orqali ishlardi.
Kompaniyaning ma’lum qilishicha, beta versiya yaqin haftalarda bosqichma-bosqich ishga tushiriladi. Dastlab ushbu imkoniyatdan Claude Max obunachilari foydalanishi mumkin bo’ladi.
Endi Claude siz bilan har doim birga
Yangi yangilanish yordamida foydalanuvchilar vazifani kompyuterda boshlab, uning bajarilish jarayonini telefon orqali kuzatishi va natijani istalgan brauzerda ochishi mumkin.
Eng qiziqarli jihatlardan biri shundaki, Claude foydalanuvchi faol bo’lmagan paytda ham vazifani bajarishda davom etadi. Hatto kompyuter yopilgan yoki telefon o’chirilgan bo’lsa ham, AI agent fon rejimida ishlashni davom ettiradi.
Muhim qarorlar baribir foydalanuvchi qo’lida
Anthropic xavfsizlik masalasiga ham alohida e’tibor qaratgan.
Agar Claude vazifani bajarish davomida foydalanuvchi qarorini talab qiladigan bosqichga kelsa, u smartfonga bildirishnoma yuboradi. Foydalanuvchi tasdiqlamaguncha hech qanday amal bajarilmaydi.
Bu yondashuv AI agentlarga ko’proq mustaqillik berish bilan birga, yakuniy nazoratni inson qo’lida saqlab qolishga xizmat qiladi.
Cowork faqat dasturchilar uchun emas
Anthropic statistikalariga ko’ra, Claude Cowork’dan foydalanishning 90 foizdan ortig’i dasturlash bilan bog’liq emas.
Foydalanuvchilar undan asosan:
- biznes jarayonlarini boshqarish;
- kontent yaratish;
- hisobotlar tayyorlash;
- xarajatlarni tahlil qilish;
- uchrashuv yozuvlari asosida taqdimotlar yaratish
kabi kundalik ish vazifalarida foydalanmoqda.
Kompaniya ma’lumotlariga ko’ra, biznes operatsiyalari va kontent yaratish Cowork’dan foydalanishning qariyb yarmini tashkil etadi.
Desktop versiyasi hali ham ustunlikka ega
Shunga qaramay, desktop ilovasi ayrim imkoniyatlari bilan ajralib turadi.
Masalan, u:
- kompyuterdagi fayllar bilan ishlash;
- mahalliy papkalarga ulanish;
- plagin va connector’lardan foydalanish;
- Chrome brauzerini boshqarish;
- Computer Use funksiyasi orqali ekrandagi elementlarni bosish, yozish va boshqarish
imkoniyatlarini taqdim etadi.
Veb versiyada esa bu funksiyalar hozircha mavjud emas.
Chat va Cowork birlashishga yaqinlashmoqda
Anthropic endi Chat va Cowork uchun yagona bosh sahifani joriy etmoqda. Loyihalar va yaratilgan hujjatlar barcha qurilmalar o’rtasida sinxron ishlaydi.
Bundan tashqari, kompaniya yangi platformalar ishga tushirilgani munosabati bilan 5-avgustgacha Cowork uchun ikki baravar foydalanish limitini saqlab qolishini ham ma’lum qildi.
Bu o’zgarishlar Anthropic kelajakda Chat va Cowork’ni yagona AI mahsulotiga aylantirishni rejalashtirayotganini ko’rsatmoqda. Bu esa OpenAI’ning ChatGPT va Codex xizmatlarini yaqinlashtirish strategiyasiga o’xshash yo’nalish hisoblanadi.
