Meta foydalanuvchilarga ommaviy Instagram akkauntlaridagi suratlarni sun’iy intellekt yordamida o‘zgartirish imkonini beruvchi yangi funksiyani ishga tushirganidan atigi bir necha kun o‘tib, uni bekor qildi. Kompaniyaning aytishicha, ushbu vosita “kutilgan natijani bermagan” va endi mavjud emas.
Hafta boshida Meta o‘zining sun’iy intellekt bo‘limi Meta Superintelligence Labs tomonidan yaratilgan Muse Image nomli yangi AI vositasini taqdim etgandi. Funksiyaning eng e’tiborli jihati shundaki, foydalanuvchilar AI yaratadigan tasvirlarda ommaviy Instagram akkauntlarini @ belgisi orqali ko‘rsatishi mumkin edi.
Boshqacha aytganda, tizim boshqa foydalanuvchilarning ochiq profillaridagi suratlarni asos sifatida olib, ular bilan bog‘liq yangi tasvirlar yaratardi. Eng bahsli tomoni esa, suratlari ishlatilgan foydalanuvchilarga bu haqda hech qanday bildirishnoma yuborilmas edi.
Yangi funksiya taqdim etilishi bilan internetda keskin tanqidlar boshlandi. Ko‘pchilik Meta odamlarning suratlaridan ularning aniq roziligisiz foydalanayotganini ta’kidladi. Foydalanuvchilar va mutaxassislar bu vosita turli suiiste’mollarga, jumladan soxta va nomaqbul tasvirlar yaratishga sabab bo‘lishi mumkinligini aytishdi.
So‘nggi yillarda AI texnologiyalari yordamida mashhur insonlar va oddiy foydalanuvchilarning soxta suratlarini yaratish holatlari ko‘payib bormoqda. Texnologiya kompaniyalari bunday muammolarni cheklash uchun turli himoya vositalarini joriy qilgan bo‘lsa-da, amaldagi choralar ko‘pincha yetarli emasligi tanqid qilinmoqda.
Juma kuni Meta rasmiy blogida ushbu funksiyani olib tashlayotganini e’lon qildi.
Kompaniya bayonotida shunday deyiladi:
“Biz foydali ijodiy vosita yaratishni va odamlarga ommaviy kontentlari qanday ishlatilishini nazorat qilish imkonini berishni maqsad qilgan edik. Biroq foydalanuvchilarning fikr-mulohazalarini tingladik va bu funksiya kutilgan natijani bermaganini tushundik. Shu sababli u endi mavjud emas.”
Dastlab Meta’ning bu qarori haqida Puck News xabar berdi. Nashr ma’lumotlariga ko‘ra, funksiya oddiy foydalanuvchilar bilan bir qatorda yirik iste’dod agentliklari, jumladan Creative Artists Agency (CAA) tomonidan ham tanqid ostiga olingan.
Bu voqea sun’iy intellekt rivojlanishi bilan bog‘liq yana bir muhim savolni kun tartibiga olib chiqdi: AI kompaniyalari foydalanuvchilarning suratlari va ommaviy kontentidan qanchalik erkin foydalanishi mumkin?
Meta bu safar tezda ortga chekindi. Biroq AI texnologiyalari tobora rivojlanib borayotgan bir paytda, maxfiylik, mualliflik huquqi va xavfsizlik bilan bog‘liq bahslar hali uzoq davom etishi aniq.
