Anthropic: Claude Cowork’dan eng ko‘p biznes va matn yozish ishlari uchun foydalanilmoqda

Anthropic kompaniyasi o‘zining AI agenti Claude Cowork qanday ishlatilayotgani bo‘yicha katta tadqiqot natijalarini e’lon qildi. Kompaniya 2026-yil 11-maydan 31-maygacha bo‘lgan davrdagi 1,2 million anonim sessiyani tahlil qilgan. Ushbu ma’lumotlar 600 mingdan ortiq tashkilot faoliyatini qamrab oladi.

Tahlil natijasiga ko‘ra, Claude Cowork’dan foydalanishning qariyb yarmi ikki asosiy yo‘nalishga to‘g‘ri keladi: biznes jarayonlari va matn yaratish ishlari.

Foydalanishning yarmi ikki toifaga to‘g‘ri keladi

Eng katta ulushni “Biznes jarayonlari va operatsiyalar” egallagan bo‘lib, umumiy foydalanishning 33,4 foizi aynan shu yo‘nalishga tegishli.

Bu toifaga quyidagi ishlar kiradi:

• Turli manbalardagi hisobotlarni birlashtirish.
• Xodimlar uchun onboarding va chek-listlar tayyorlash.
• Excel va boshqa jadvallarni tartibga solish.
• Ichki jarayonlarni avtomatlashtirish.

Ikkinchi o‘rinda “Kontent yaratish va kopirayting” turibdi. U umumiy foydalanishning 16,4 foizini tashkil qiladi.

Bu yerda foydalanuvchilar:

• maqolalar;
• taqdimotlar;
• ijtimoiy tarmoq postlari;
• takliflar;
• hujjatlar

kabi matnlarni yaratmoqda.

Anthropic bunday vazifalarni “asosiy ish atrofidagi ishlar” deb ataydi. Ya’ni, ko‘pchilikning asosiy kasbi bu bo‘lmasa ham, deyarli har bir ofis xodimi shu kabi vazifalarni bajarishga majbur.

Dasturlash ulushi kutilganidan past chiqdi

Ko‘pchilik AI agentlari asosan dasturchilar uchun ishlatiladi deb o‘ylashi mumkin. Biroq statistik ma’lumotlar boshqacha manzarani ko‘rsatmoqda:

• Dasturlash: 8,7%
• DevOps va infratuzilma: 7%
• Tadqiqot ishlari: 6,4%
• Ma’lumotlar tahlili: 5,8%
• Hujjatlarni qayta ishlash: 4,1%
• Savdo operatsiyalari: 4%
• Shaxsiy yordamchi vazifalari: 3,8%
• Ta’lim: 2,4%
• Uchrashuvlarni tahlil qilish: 1,8%

Anthropic ma’lumotlariga ko‘ra, Claude Cowork’dan eng ko‘p biznes jarayonlari (33,4%) va kontent yaratish (16,4%) uchun foydalaniladi. Dasturlash esa umumiy foydalanishning atigi 8,7 foizini tashkil qilgan.

Bu natijalar Anthropic’ning bir necha yillik strategiyasini tasdiqlaydi: texnik foydalanuvchilar ko‘proq Claude Code orqali ishlasa, oddiy xodimlar uchun qulay chat interfeysi bo‘lgan Claude Cowork kundalik ishlarni yengillashtiradi.

Claude Cowork odamlarga nimada yordam beradi?

Anthropic bir nechta misollar keltirgan:

• Yuristlar hujjatlarni tayyorlash va tartibga solishni AI’ga topshirib, ko‘proq huquqiy tahlil bilan shug‘ullanishi mumkin.
• HR menejerlari intervyularni rejalashtirish va nomzodlar haqidagi fikrlarni jamlashni avtomatlashtiradi.
• Jamoa rahbarlari taqdimotlarni AI yordamida tayyorlab, qaror qabul qilishga ko‘proq vaqt ajratadi.

Kompaniya fikricha, ko‘pincha eng qiyin bosqich ishni boshlashdir. Claude Cowork esa g‘oya va ma’lumotlarni tezda birinchi qoralamaga aylantirib beradi.

Tadqiqotning cheklovlari ham bor

Anthropic o‘zi ham tadqiqot mukammal emasligini tan olgan.

Masalan:

• Marketing, moliya va HR uchun alohida toifalar yo‘q.
• Eng yuqori yuklama vaqtlaridagi barcha sessiyalar hisobga olinmagan.
• Statistika foizlarda berilgan, mutlaq sonlar ochiqlanmagan.
• Taxminan 5% foydalanish ish bilan bog‘liq emas, ya’ni foydalanuvchilar AI’dan shaxsiy suhbatlar va hobbilari uchun ham foydalanmoqda.

Katta trend nimada?

Meta, Stanford universiteti va Illinoys universiteti tadqiqotchilarining yangi ilmiy maqolasiga ko‘ra, AI tizimlari tobora “kod yozuvchi vosita”dan “ishga yordam beruvchi hamkor”ga aylanmoqda.

Bugungi kunda Claude Cowork, Claude Code va OpenAI’ning Codex (ChatGPT Work) kabi mahsulotlari aynan shu yo‘nalishning eng yorqin namunalari hisoblanadi.

Bir paytlar AI’dan faqat kod yozish uchun foydalaniladi deb o‘ylashardi. Endi esa odamlar undan ko‘proq hisobot tuzish, taqdimot tayyorlash, hujjatlar bilan ishlash va kundalik ofis vazifalarini bajarishda foydalanmoqda. Insoniyat nihoyat robotlarga eng zerikarli ishlarni topshirishni boshladi. AI ham, ehtimol, bundan unchalik xursand emasdir.